O pasado 3 de outubro, Monforte celebrou os actos conmemorativos do Día da Policía Nacional, coincidindo coa festividade dos Santos Anxos Custodios. O alcalde, José Tomé Roca, acompañado por diversas autoridades e representantes dos corpos de seguridade, participou nos actos litúrxicos e institucionais que tiveron lugar na igrexa da Régoa e no Centro do Viño.
Tras a celebración relixiosa, celebrouse no Centro do Viño o acto institucional, onde foron impostas condecoracións a varios membros da Policía Nacional. Entre os recoñecidos, destacaron os axentes Carlos Carballo Vázquez e Óscar Fernández Fidalgo, que recibiron a Medalla ao Mérito Policial con Distintivo Blanco polo seu servizo destacado. Ademais, o policía xubilado José Manuel García Somoza foi homenaxeado co Diploma de Policía Honorario, un recoñecemento á súa longa traxectoria.
Durante o acto, o alcalde recolleu en nome do Concello unha metopa en recoñecemento á súa colaboración institucional coa Policía Nacional, coincidindo co 200 aniversario da creación do Corpo. Tomé Roca salientou a «inestimable labor» da Policía Nacional destacando a cooperación estreita e eficaz entre os axentes da Policía Nacional e da Policía Local.•
Cargando ...
