O deputado do BNG Iago Suárez denunciou a “situación lamentable” do servizo de transporte escolar no Concello de Folgoso do Courel, provocada polo “terrible e perigoso” desvío que deben utilizar os autobuses tras o derrubamento da LU-651, ocorrido hai máis de dous anos. Durante a súa visita ao CEIP Poeta Uxío Novoneyra, Suárez falou coa comunidade educativa e comprobou de primeira man as deficiencias do desvío alternativo, que conecta os principais núcleos de poboación, Folgoso e Seoane.
O deputado recordou que o Goberno galego prometeu repetidamente a reparación da estrada, sen que, até agora, se leve a cabo. “A situación segue exactamente igual”, afirmou Suárez. A pasada xornada, o deputado presentou a situación no Pleno do Parlamento, onde a conselleira de Infraestruturas, María Martínez Allegue, asegurou que o tráfico na LU-651 se restablecería antes do inicio do curso escolar, afirmación que resultou ser infundada.
“Non tiñamos moitas esperanzas na promesa da conselleira, e as nosas sospeitas confirmáronse”, engadiu Suárez, que considera que a falta de acción do Goberno amosa un “desleixo e desprezo á poboación do Courel”. A situación actual é tal que, recentemente, un autobús escolar pinchou un pneumático debido ao mal estado do desvío, obrigando a cerca de 30 nenos a percorrer o camiño a pé até o colexio.
Iago Suárez subliñou a indignación que provoca que a Xunta permita esta situación durante máis de dous anos. “Exiximos que se arranxe a LU-651 canto antes e que se realice un estudo integral sobre as causas do derrubamento”, demandou. O BNG ten a intención de volver presentar iniciativas no Parlamento para reclamar que se axilicen as obras e se garanta a seguridade no transporte escolar dos nenos e na poboación en xeral.•
Cargando ...
