O Xeoparque Montañas do Courel acolle aos participantes das XXXIX Xornadas de Paleontoloxía

Acto de benvida ao medio millar de expertos que estes días celebraron na Coruña a 39 edición das Xornadas de Paleontoloxía, que se clausuraron cunha visita a un xacemento de fósiles no Xeoparque do Courel. Foto GPCQ.

Os participantes das XXXIX Xornadas da Sociedade Española de Paleontoloxía, que se celebraron a pasada semana en A Coruña, achegáronse ata o Xeoparque Montañas do Courel. A visita, a única saída de campo da reunión, tiña como obxectivo observar sobre o terreo un xacemento de fósiles do Paleozoico descoberto en Ribas de Sil. Destes fósiles hai mostras no Museo Xeolóxico, onde foron recibidos institucionalmente polo alcalde de Quiroga, José Luis Rivera; o presidente do Xeoparque Montañas do Courel, Roberto Castro; e Marisol Morandeira, deputada provincial de Muller e Igualdade.
Roberto Castro deulles a benvida e destacou que “é un orgullo moi grande que a vosa visita de campo se celebre no Xeoparque”. Os organizadores do congreso científico elixiron o xeoparque pola abundancia de materiais de interese, xa que o xacemento de graptolitos constitúe un exemplo de combinación de fósiles e tectónica. Os graptolitos son animais mariños de pequeno tamaño que viviron no Silúrico, entre fai 444 e 419 millóns de anos.
Os participantes, guiados por Juan Carlos Gutiérrez-Marco (Instituto de Geociencias, CSIC-UCM) e Sara Romero (Universidad Complutense de Madrid), visitaron o xacemento de graptolitos en Ribas de Sil.•