As Escolas Deportivas de Quiroga xa comezaron a súa nova andaina, contando cunha participación de máis de 80 nenos e nenas de idades comprendidas entre os 6 e os 13 anos. Neste curso, os mozos poderán practicar as modalidades de fútbol sala e voleibol. Os primeiros en iniciarse nos adestramentos foron os pequenos das categorías prebenxamín e benxamín de fútbol sala.
Na tarde de onte, tamén comezaron as sesións de voleibol para as categorías benxamín e alevín, que están formadas por nenos e nenas nacidos entre 2013 e 2018. Os adestramentos terán lugar os martes e xoves a partir das catro e media da tarde. Na mesma xornada, comezaron tamén os adestramentos para os alevíns de fútbol sala (nados en 2013 e 2014), que se adestrarán todos os martes e xoves a partir das cinco e media da tarde. Por último, as categorías infantil e cadete (nados entre 2009 e 2012) iniciaron os seus adestramentos onte, programados para os martes e xoves ás seis e media da tarde.
Este ano, os novos participantes terán a oportunidade de probar de forma gratuíta durante as dúas primeiras semanas, sempre que formalicen a inscrición. Ademais, por primeira vez inclúese no folleto de inscrición a opción de marcar a posibilidade de xogar competición federada, xunto á liga escolar na que sempre participan as Escolas Deportivas de Quiroga. A decisión de federarse dependerá da maioría dos inscritos en cada categoría.•
Cargando ...
