A conselleira do Medio Rural, María José Gómez, reafirmou no Parlamento o compromiso da Xunta cos viticultores da Denominación de Orixe Ribeira Sacra, presentando un amplo paquete de medidas de apoio debido á actual situación de excedentes e descenso no consumo de viño tinto. O pasado 1 de outubro, publicouse a liña de axudas para a destilación de crise, que permite ás bodegas acollerse a un total de 500.000 euros, podendo ampliarse a 2,4 millóns se é necesario.
Ademais, Gómez destacou unha nova liña de axudas para a conservación do entorno paisaxístico, cunha dotación de 2 millóns de euros, que se publicará a finais de ano, co obxectivo de poñer en valor a viticultura heroica da zona. A conselleira subliñou a importancia da paisaxe na candidatura da Ribeira Sacra a Patrimonio Mundial da UNESCO.
Tamén se anunciou un programa de formación sobre as oportunidades que ofrece a PAC, centrado no ecorrexime de cultivo leñoso. Até o momento, só o 28% dos viticultores están solicitando esta axuda.•
Cargando ...
