Este mes de outubro comezaron oficialmente as obras da Residencia da Terceira Idade de Pantón, tras os traballos previos de desterre realizados durante os meses de verán. A nova infraestrutura, que estará xestionada pola Fundación San Rosendo, está a ser construída nunha leira cedida polo Concello de Pantón, situada entre as rúas Fernández Núñez e Ourense, preto da Praza do Concello e por baixo da Casa da Cultura.
As obras foron adxudicadas á empresa Gómez Crespo a comezos do verán e teñen un orzamento de 1.500.000 euros. O prazo de execución previsto é dun ano e medio, polo que se espera que a residencia estea finalizada en decembro do próximo ano.
As novas instalacións contarán con capacidade para 36 prazas e xerarán 25 postos de traballo, converténdose nun servizo clave para a atención á poboación de maior idade de Pantón e arredores.
O alcalde de Pantón, José Luis Álvarez, destacou a importancia deste proxecto para a comunidade: “A posta en marcha das obras da residencia representa un paso fundamental nas nosas xestións para garantir que a nosa xente maior poida recibir os mellores coidados posibles sen ter que abandonar o seu municipio. Será un servizo de gran valor para o benestar da veciñanza”. A Fundación San Rosendo seguirá sendo responsable da xestión do centro unha vez rematadas as obras.•
Cargando ...
