Galicia rexistra a cifra de paro máis baixa nun mes de setembro desde 1996

A comunidade galega acada 1.085.846 persoas afiliadas á Seguridade Social, o número máis elevado desde 2008 para un mes de setembro

O mercado laboral en Galicia segue a mostrar unha evolución positiva ao alcanzar en setembro de 2024 a cifra de paro máis baixa nun mes de setembro desde que hai rexistros, con 120.992 persoas desempregadas. Así o destacou o conselleiro de Emprego, Comercio e Emigración, José González, ao valorar os últimos datos de paro e afiliacións á Seguridade Social. Galicia conta con 1.085.846 persoas afiliadas, o número máis elevado nun mes de setembro desde 2008, e cun incremento de 14.734 persoas en relación co mesmo mes do ano pasado.
O conselleiro salientou que, aínda que setembro adoita ser un mes no que o paro sobe levemente debido á finalización de contratos temporais, a evolución anual do desemprego é moi positiva, cunha caída do 7,39%. Este descenso sitúa a Galicia como a terceira comunidade autónoma con maior redución de paro no último ano, superando en case dous puntos a baixada do conxunto do Estado.
Por provincias, o desemprego descendeu en todas as galegas e en todos os sectores de actividade. A construción e o sector primario foron os que lideraron a baixada, con descensos do 11,85% e 12,63%, respectivamente. Tamén se rexistrou unha caída do paro entre colectivos prioritarios nas políticas activas de emprego da Xunta, como as mulleres (-7,45%), os menores de 30 anos (-7,12%) e os parados de longa duración (-7%).

Ademais, as cifras de desempregados xuvenís (13.792) e mulleres desempregadas (71.538) son as máis baixas nun mes de setembro desde 2005, mentres que a de parados de longa duración (61.647) é a máis baixa dos últimos 16 anos.
O conselleiro González subliñou tamén o incremento da contratación, con máis dun 14% de contratos novos respecto ao mes anterior e un aumento significativo dos contratos indefinidos, que subiron máis dun 40%.
José González destacou o compromiso da Xunta para seguir creando emprego de calidade, grazas ás medidas estratéxicas en colaboración co tecido produtivo. Salientou a implantación da intelixencia artificial EMi nas 54 oficinas de emprego galegas, unha ferramenta destinada a casar de xeito eficiente a oferta e a demanda laboral.
O conselleiro lembrou que están abertas axudas para apoiar a contratación de axentes de emprego nos concellos e entidades sen ánimo de lucro.•