O secretario xeral da Lingua, Valentín García, visitou Chantada este martes, 22 de outubro, para participar na campaña de recollida de voces galegas do Proxecto Nós. O acto contou coa colaboración do Concello de Chantada, representado polo alcalde Manuel Lorenzo, e coa participación do alumnado do CEIP Xoán Requeixo.
Durante a xornada, que tamén incluíu a primeira experiencia piloto de doazón de voces infantís, Valentín García expresou a súa satisfacción pola alta participación. “Esta iniciativa enriquece de maneira significativa o noso banco de voces, onde buscamos a maior variedade posible”, declarou o secretario xeral, agradecendo o apoio do profesorado e as familias que deron o seu consentimento para a recollida de voces dos máis pequenos.
O Proxecto Nós, segundo explicou García, é unha das accións “máis ambiciosas” do Goberno galego para garantir a presenza do galego no ámbito dixital, un espazo clave para afianzar o seu uso entre as xeracións máis novas. O responsable de Lingua da Xunta destacou a importancia da colaboración cidadá, recalcando que iniciativas como esta “son esenciais para garantir que as ferramentas dixitais recoñezan e interactúen en galego”.
A campaña permite que calquera persoa se achegue ás aulas CEMIT para gravar a súa voz, ou ben, facelo telematicamente a través da web Doa a túa voz. O obxectivo é acadar 1.000 horas de gravación e superar o millón de frases en galego.
Na web do Proxecto Nós xa se pode experimentar con aplicacións baseadas en redes neuronais: a conversión de texto a voz, un tradutor neuronal, e un sistema de recoñecemento da fala en galego, que busca ampliar a capacidade de interacción oral coa tecnoloxía na nosa lingua.•
Cargando ...
