Danse a coñecer os detalles do proxecto definitivo da reforma integral da Piscina Municipal de Monforte

A reforma, cofinanciada polo Consello Superior de Deportes, a Deputación de Lugo e o propio Concello, modernizará unha infraestrutura clave para o deporte local

O Alcalde de Monforte, José Tomé Roca, presentou o 21 de outubro o proxecto definitivo das obras de mellora da Piscina climatizada municipal de A Pinguela. A Xunta de Goberno aprobou a adxudicación deste proxecto a Construcciones Castro por un total de 2.025.720,52 euros, que inclúe tanto a elaboración do proxecto como a execución das obras, cuxa finalización está prevista antes do verán de 2025.
A reforma, que foi presentada como un cambio integral das instalacións, dará lugar a unha infraestrutura practicamente nova. “A piscina terá unha nova imaxe interna e externa, similar ao pavillón polideportivo, o que permitirá manter a harmonía estética no complexo da Pinguela”, subliñou o alcalde. A intervención abarcará espazos como a entrada, a cafetería, o ximnasio, as gradas, os vestiarios e os accesos interiores, ademais de introducir melloras significativas na eficiencia enerxética e na accesibilidade para persoas con mobilidade reducida.
O investimento total ascenderá a 2.047.009,42 euros, dos cales o 31,5 % será financiado polo Consello Superior de Deportes, cunha subvención de 644.882,94 euros. A Deputación Provincial de Lugo aportará 600.000 euros en dúas anualidades (2024 e 2025), o que representa o 29,3 % do total, mentres que o Concello de Monforte completará o financiamento con 802.126,48 euros, equivalentes ao 39,2 % do investimento.
Esta reforma integral enmárcase no compromiso do goberno local por mellorar as infraestruturas da cidade, especialmente na área deportiva. Tomé destacou que “grazas á colaboración entre o Estado, a Deputación e o Concello, podemos afrontar este proxecto, ao que a Xunta de Galicia non contribuíu”. Ademais, o alcalde remarcou que o complexo de A Pinguela se consolidará como unha referencia deportiva na provincia de Lugo, con instalacións modernas e accesibles para toda a cidadanía.
O proxecto contempla a reorganización funcional da piscina e as súas instalacións, eliminando os accesos dobres e as escaleiras internas para facilitar a circulación dos usuarios.
A entrada principal será desprazada cara á esquina para crear un vestíbulo común coa piscina e o pavillón polideportivo, mellorando a accesibilidade e o control de acceso. Tamén se reformarán a cafetería e as gradas, ampliando os espazos para espectadores e permitindo o funcionamento independente da cafetería mesmo cando a piscina estea pechada.
A piscina manterá o vaso actual, pero o resto das instalacións, incluídos os vestiarios, serán renovadas para cumprir coas normativas de accesibilidade. O ximnasio será trasladado á zona sur do edificio, ampliando a súa superficie para mellorar a experiencia dos usuarios. As gradas tamén serán ampliadas, coa creación dun novo acceso que conectará directamente co vestíbulo principal.
A nivel exterior, o edificio contará cun novo revestimento a través dun sistema de illamento térmico exterior (SATE), que mellorará a eficiencia enerxética e a estética do conxunto.
As melloras incluirán tamén a modernización do sistema de climatización. Ademais, implementarase un sistema de monitorización dixital da actividade na piscina, que permitirá mellorar a seguridade e o control da práctica deportiva.
As obras están previstas que finalicen en setembro de 2025, aínda que se espera que as instalacións poidan estar dispoñibles antes do verán do próximo ano.•