A Xunta impulsa iniciativas para dinamizar a economía, atraer talento e fixar poboación no rural galego
Galicia reforza o seu compromiso co emprendemento como motor de crecemento e xeración de emprego. O Goberno galego vén de posicionar esta área como unha das súas prioridades, desenvolvendo ferramentas para que aquelas persoas interesadas en poñer en marcha un proxecto empresarial na Comunidade atopen o apoio necesario para facelo realidade. Un dos exemplos máis destacados deste compromiso é a creación, en xullo de 2022, da Rede de polos de emprendemento e apoio ao emprego, un programa público que ofrece asesoramento gratuíto e individualizado tanto para quen desexa emprender como para quen xa o fixo e precisa consolidarse.
A Rede, que ten como un dos seus obxectivos principais dinamizar o rural e combater o reto demográfico, conta actualmente con 14 oficinas repartidas polas catro provincias galegas: tres na Coruña (Ferrol, Coristanco e Melide), cinco en Lugo (Friol, Mondoñedo, Sarria, A Fonsagrada e Monforte de Lemos), catro en Ourense (O Carballiño, Baños de Molgas, O Barco de Valdeorras e Verín) e dúas en Pontevedra (Silleda e O Porriño).
Dende a súa creación, a Rede xa atendeu máis de 2.600 iniciativas emprendedoras, sendo o sector servizos o máis predominante, seguido da hostalería e do comercio.
Unha das liñas máis innovadoras da Rede é o seu plan de remuda xeracional, que facilita a transmisión de negocios en activo entre aqueles que están a piques de xubilarse e as persoas interesadas en continuar coa súa actividade. Este programa, dotado con 1,5 millóns de euros, contribúe a evitar o peche de empresas en Galicia e a manter proxectos consolidados e viables. Tamén destaca a Estratexia Galicia Retorna, que busca favorecer o regreso de emigrantes galegos e os seus descendentes, facilitando a súa integración sociolaboral a través do autoemprego e do apoio á creación de negocios. Neste ámbito, o programa Merlo ofrece un servizo de mentoría especializado para aqueles emprendedores retornados.
Outro dos eixos estratéxicos no impulso ao emprendemento é a atracción de nómades dixitais ao rural galego. Esta nova tipoloxía de profesionais en remoto, cada vez máis común grazas ás novas tecnoloxías, atopa en Galicia un espazo ideal para desenvolver a súa actividade a través de iniciativas como os colivings. A Xunta puxo en marcha o proxecto Fixar, que engloba tres espazos de coliving en Lobeira (Ourense), Anceu (Ponte Caldelas, Pontevedra) e O Piñeiro (Laxe). Actualmente, esta rede conta con 60 participantes, entre os que se atopan profesionais internacionais de sectores como os videoxogos, o cinema e a tecnoloxía.
Estas iniciativas contribuíron a que Galicia recibise recentemente o recoñecemento como Rexión Emprendedora Europea 2025, un galardón que destaca o traballo da Comunidade no desenvolvemento de proxectos empresariais que dinamicen a economía local, atraian traballadores cualificados e impulsen novas oportunidades de negocio. Para complementar estas accións, o Goberno galego lanzou o Mapa do Emprendemento virtual, que reúne a 190 entidades e todos os recursos dispoñibles para poñer en marcha un proxecto empresarial en Galicia, así como a publicación de microguías prácticas que se distribúen tanto en liña como nas oficinas da Rede de polos.•
Cargando ...
