O Concello de Samos reforzou o seu parque de maquinaria para o mantemento das vías municipais coa compra dun tractor e unha mini pa, vehículos adquiridos grazas ao apoio da área de Rural da Vicepresidencia da Deputación de Lugo. Estes vehículos polivalentes permitirán realizar diversas tarefas de limpeza, desbroce e mantemento nas 24 parroquias do municipio.
O tractor conta cunha desbrozadora lateral e unha coitela para a neve. Complementa este equipamento unha máquina hidrolimpadora para a limpeza de muros, beirarrúas e varandas.
A alcaldesa, Chus López, destacou que “grazas a esta nova maquinaria dobramos o ritmo de traballo na limpeza e desbroce das pistas municipais e afrontaremos o inverno con maiores garantías”. López subliñou a importancia da colaboración institucional para facer fronte a este investimento, que o Concello non podería asumir só.
Pola súa banda, o vicepresidente da Deputación de Lugo, Efrén Castro, valorou o esforzo económico e de persoal que implica o mantemento das vías municipais nos concellos rurais, fundamentais para a mobilidade e o desenvolvemento das actividades agrogandeiras.•
Cargando ...
