O Partido Popular de Sarria solicitará un pleno extraordinario para esixir a reapertura do matadoiro municipal, que permanece pechado, e para pedir explicacións ao alcalde e ao goberno local. Os populares acusan ao equipo de goberno de “deixadez premeditada” para abocar o servizo á situación actual e consideran que esta inacción impediu que o matadoiro estea en funcionamento para a campaña de matanzas, como se prometera.
A voceira do PP, Carmen José López, esíxelle ao alcalde que “deixe de mentir”, lembrando que o rexedor asegurara que o matadoiro estaría operativo en outubro, algo que finalmente non se cumpriu. Ademais, denuncia que o resto de grupos municipais non tiñan coñecemento desta decisión, e que o goberno non lles proporcionou información, obrigándoos a enterarse pola prensa. “O alcalde actúa de forma unilateral e impide que outros grupos poidan acceder a información relevante sobre este servizo”, criticou López.
Os concelleiros populares consideran prioritario que o goberno municipal “recupere o servizo do matadoiro de forma urxente” para non prexudicar aos usuarios, instando a realizar as reparacións necesarias canto antes. Acusan ao executivo local de “afundir un servizo que levaba décadas funcionando” e de non acometer ningunha mellora para o seu correcto funcionamento nos últimos cinco anos. “O propio alcalde recoñece que esta situación é un problema da súa xestión”, asegurou a voceira.
O grupo popular esixe a reactivación da comisión de investigación do matadoiro, que xa solicitaron previamente, e ampliala á supervisión da xestión do servizo. Neste sentido, o PP mantén que a situación actual é “a consecuencia directa da decisión do alcalde de desfacerse deste servizo municipal”.•
Cargando ...
