Reclaman marquesinas para as paradas de autobús en Escairón

A Asociación Veciñal do Saviñao trasladou ao Concello a necesidade de instalar marquesinas en tres paradas de autobús en Escairón, un reclamo que xorde tras recibir múltiples queixas por parte da veciñanza. Actualmente, moitos usuarios deben refuxiarse da chuvia e do vento baixo os voladizos das casas mentres esperan o transporte público con dirección a Monforte, Chantada ou Santiago.
Esta situación agrávase especialmente nos meses de inverno, cando os estudantes deben desprazarse aos seus centros educativos. Resulta sorprendente que, mentres outras parroquias e barrios da localidade dispón de marquesinas construídas por un Obradoiro anterior, a capitalidade municipal careza deste servizo básico.
A asociación solicita que se instalen dúas marquesinas na rúa Pardo Bazán e unha na rúa Xosé Portela, sinalando que estas estruturas, de tamaño reducido, non deberían supoñer un obstáculo para o paso dos transeúntes.•