Formou a 20 desempregados en especialidades con alta demanda laboral. A nova edición dará comezo en decembro, con novas especialidades e un investimento de 943.000 euros
O delegado territorial da Xunta en Lugo, Javier Arias, clausurou a sétima edición do obradoiro de emprego Ricra, no que participaron 20 persoas desempregadas das comarcas de Pantón, O Saviñao e Sober. A súa clausura contou tamén coas intervencións dos alcaldes dos concellos implicados, José Luis Álvarez (Pantón), Carlos Armesto (O Saviñao) e Iván Armesto (Sober), entre outros representantes municipais.
O obradoiro foi financiado pola Consellería de Emprego, Comercio e Emigración, cun investimento total de 943.000 euros para as dúas edicións. Durante esta séptima edición, as especialidades formativas foron Repoboacións forestais e tratamentos silvícolas, para 13 alumnos, e Atención sociosanitaria a persoas dependentes en institucións, para sete participantes. Ao longo do programa, os alumnos recibiron formación teórica e práctica, realizando traballos en colaboración cos concellos na mellora de servizos e espazos públicos.
ACTUACIÓNS REALIZADAS
Entre as actuacións realizadas, destacaron a mellora de rutas de sendeirismo, camiños e áreas recreativas nos tres municipios. Así, en Pantón traballaron na ruta dos Fidalgos, a de Cibrisqueiros a San Cosmede, e a de Xan de Arteiro.
No Saviñao, os traballos incluíron o mantemento do campo da festa de Currelos e os accesos ao campo de fútbol de Escairón. En Sober, as intervencións centráronse en máis de dez miradoiros, 22 igrexas e cemiterios, e a ruta dos muíños dos Chancís.
Javier Arias anunciou que a nova edición do obradoiro, que comezará a principios de decembro, manterá a especialidade de Repoboacións forestais e tratamento silvícolas, e incorporará novas especialidades como Actividades auxiliares en conservación e mellora de montes e Traballos de carpintería e moble.
Arias subliñou a importancia dos obradoiros de emprego como ferramentas clave para a reciclaxe profesional en sectores con elevada demanda de traballadores, e como un apoio esencial para os servizos municipais. “Este labor contribúe directamente ao benestar da veciñanza, mellorando infraestruturas e dotacións públicas”, destacou.•
Cargando ...
