Monforte inicia o proxecto de recuperación da histórica Rúa Vella

O proxecto contempla a mellora do pavimento orixinal e a restauración de tramos dos muros que delimitan a rúa

O alcalde de Monforte de Lemos, José Tomé Roca, anunciou en rolda de prensa o inicio dun proxecto de mellora dunha das vías máis emblemáticas e históricas da cidade: a Rúa Vella. Situada no corazón do casco histórico de Monforte, intramuros, ao pé do monte de San Vicente, conserva un gran valor patrimonial. A Rúa Vella, cuxo trazado remóntase ao século XII, desempeñaba un papel crucial na comunicación entre as portas principais da vila e o antigo Palacio Condal, hoxe coñecido como a Porta da Alcazaba. A súa construción formaba parte dun sistema viario medieval que unía as partes máis altas da cidade coas zonas máis baixas, ao redor do monte de San Vicente. Sen embargo, a súa decadencia comezou a mediados do século XVI, cando o crecemento urbano se trasladou fóra das murallas, e os cambios no século XX, como a construción dos depósitos de auga potable, supuxeron a destrución de boa parte do seu pavimento orixinal.
José Tomé explicou que o obxectivo do proxecto é recuperar o pavimento orixinal da rúa, así como mellorar e acondicionar toda a vía para a súa integración no tecido urbano actual. «Queremos recuperar esta rúa, un camiño histórico que, a día de hoxe, parece máis un sendeiro rural que unha vía urbana», sinalou o alcalde, facendo referencia ao avanzado estado de abandono no que se atopa a rúa.
O proxecto de recuperación da Rúa Vella comezou cun levantamento topográfico e cunha limpeza arqueolóxica dirixida polo arqueólogo municipal Iván A. Álvarez Merayo. Este traballo previo permitiu identificar as zonas onde se conserva o pavimento orixinal e onde será necesario realizar intervencións. Segundo o informe do arqueólogo, a rúa conserva o pavimento orixinal na súa zona baixa, pero a medida que se sobe cara ao monte de San Vicente, o pavimento foi alterado ao longo dos séculos, especialmente no século XX, cando se construíron os depósitos de auga.
O proxecto de mellora levarase a cabo ao longo de 156 metros lineais, cun ancho medio de 4 metros, o que supón unha superficie total de actuación de 579 metros cadrados. Para facelo, dividirase en catro zonas de actuación específicas:

• Zona 1: Na que se realizou un desescombro que revelou o pavimento orixinal, e se procederá á súa limpeza manual.
• Zona 2: Onde se supón que o pavimento orixinal permanece baixo unha capa de terra vexetal.
• Zona 3: Onde se considera que non existe pavimento orixinal, polo que se procederá á escavación e colocación de novo pavimento de canto rodado.
• Zona 4: O ramal de acceso aos depósitos de auga, que tamén carece de pavimento orixinal, e que se acondicionará con pavimento diferenciado para vehículos e peóns.
  O proxecto contará cun orzamento de 99.440,99€.
  O alcalde resaltou a importancia desta actuación, destacando que a mellora da Rúa Vella “é un proxecto que pon en valor unha parte fundamental da nosa historia, e coa súa recuperación tamén estamos coidando o noso pasado e mellorando a imaxe da cidade”.•