Foto GPXG.
Antes de que remate este ano, o Diario Oficial de Galicia (DOG) publicará unha nova convocatoria de axudas para apoiar a elaboración e comercialización de produtos vitivinícolas, cun orzamento total de 11,4 millóns de euros, o que supón un 75% máis que na convocatoria anterior. Así o confirmou a conselleira do Medio Rural, María José Gómez, durante a súa visita á adega Santiago Ruiz, no municipio de Tomiño.
A conselleira destacou o apoio continuo do Goberno galego ao sector vitivinícola, especialmente ás adegas, que son as principais beneficiarias desta liña de axudas. O obxectivo destas subvencións é mellorar o rendemento global das empresas do sector, adaptarse ás demandas do mercado, aumentar a competitividade e fomentar a innovación e a sustentabilidade.
As axudas financian diferentes actuacións, como a mellora de infraestruturas, a compra de maquinaria ou a adquisición de material informático. Unha vez publicada a convocatoria, os interesados poderán presentar as súas solicitudes ata finais de 2025.
María José Gómez tamén fixo un balance da vendima deste ano, destacando que Galicia recolleu 74 millóns de quilos de uva, a segunda maior cifra do último decenio. En particular, a Denominación de Orixe Rías Baixas rexistrou un incremento dun 10,5% na súa colleita, con máis de 42 millóns de quilos de uva. •
Cargando ...
