A Xunta de Galicia reiterou o seu apoio ao matadoiro municipal de Sarria, consciente da importancia deste servizo para o sector agrogandeiro e a industria cárnica na comarca. A conselleira do Medio Rural, María José Gómez, e o alcalde de Sarria, Claudio Garrido, mantiveron unha xuntanza de traballo na que tamén estivo presente Olga Iglesias, directora territorial da Consellería en Lugo.
Durante a reunión, a conselleira transmitiu ao rexedor a confianza do Goberno galego en que o equipo de goberno municipal resolverá os problemas de xestión que afectan ás instalacións, co obxectivo de recuperar a súa actividade normal e o uso público. Nesta liña, Gómez subliñou que o seu departamento é plenamente consciente da relevancia deste servizo para a cidadanía da bisbarra e é sensible ás demandas dos veciños, no sentido de recuperar o seu funcionamento normal. Engadiu que, en consecuencia, a Consellería está aberta a estudar posibles vías de cooperación neste asunto, sempre en beneficio dos veciños e do dinamismo económico de toda a contorna. Así, a conselleira ofreceu colaboración ao Concello sempre e cando este presente un proxecto económico sólido e viable para continuar coa actividade do matadoiro. Esta comarca, que conta cun número destacado de granxas de porcino e pequenos obradoiros cárnicos, ve no matadoiro un servizo clave para o sector.•
Cargando ...
