O Alcalde de Monforte, José Tomé Roca, anunciou a designación do campo do Club de Golf Río Cabe como sede do Campionato de España de Federacións Autonómicas de Pitch & Putt 2025. O evento, que se celebrará os días 3, 4 e 5 de outubro de 2025, contará coa participación de 16 seleccións autonómicas, que competirá polo título nacional. As seleccións de Castela e León, Galicia, Asturias, Baleares, Andalucía, Cantabria, Castela A Mancha, Navarra, Canarias, Aragón, A Rioxa, País Vasco, Madrid, Comunidade Valenciana, Murcia e Estremadura, participarán nun evento que reunirá a uns 100 xogadores, ademais de familiares e amigos.
José Tomé destacou que a cidade será, por segundo ano consecutivo, sede dunha competición de tan alto nivel, tras o éxito do Campionato de España masculino de Pitch & Putt que se celebrou en maio de 2024. O Alcalde tamén puxo en valor o traballo do Club de Golf Río Cabe, que foi clave para que Monforte lograse acoller eventos desta magnitude.
O campo, que recentemente pasou de 9 a 18 foxos, permitirá realizar unha competición de altísimo nivel.
Este campionato terá unha importante repercusión económica, non só polo número de deportistas, senón tamén polo incremento do turismo que traerá consigo. Monforte e a Ribeira Sacra se beneficiarán do impacto que xerará a chegada de xogadores e acompañantes. O Alcalde sinalou que, ademais do impacto económico, o evento será unha excelente oportunidade para promover a riqueza turística, patrimonial e gastronómica da comarca.
O presidente do Club de Golf Río Cabe, José Ángel Pérez Reñones, agradeceu o apoio do Concello e destacou a importancia de contar cun campo de golf de 18 foxos para acoller competicións de nivel nacional. Tamén anunciou que o Parador de Monforte de Lemos será o hotel de concentración para os participantes.
O evento contará cun programa de adestramentos e competicións durante o primeiro fin de semana de outubro, culminando cunha cerimonia de entrega de premios no campo de Río Cabe.•
Cargando ...
