MAR LÓPEZ SOTELO
Reportera, Radio Monforte
Amigos ribeiraos, a pesar do duro que sexa o camiño, non se me afrouxaron as forzas para seguir tecendo esta Rede na Ribeira Sacra con xente abraiante. Socalco a socalco, seguimos crecendo, non só en Galicia senón que tamén se unen a nós moitos galegos na diáspora, como a Rede de Galegos no Reino Unido, a Asociación de Galegos na China ou os que viñeron a visitarnos e quedaron enamorados desta terra e formaron o seu fogar nela. Son os meus xenes ribeiraos e da Costa da Morte os que me inspiran hoxe aquí a facer este artigo, unha pequena homenaxe a unha heroica familia adegueira da pequeña aldea de Margaride do Lor, en Quiroga. A pesar de ter que superar duros traballos nas viñas, moitas inclemencias do tempo e un gran incendio forestal, nesta familia saben o importante que é que o pobo estea unido ante a adversidade. Así pasou cando nesta rede saltou a alarma activada polos nosos amigos Pablo, Sandra e Geovanni de Adega EDV D.O Ribeira Sacra, en solidariedade coa Denominación de Orixe Utiel-Requena, solicitándonos un punto de recollida e divulgación de axuda para os afectados pola DANA que provocou terribles inundacións na Comunidade Valenciana. A reacción foi inmediata: desde Radio Monforte emitiuse un comunicado solicitando colaboración cidadá e deseguida empezaron a chegar ás nosas instalacións innumerables mostras de apoio en forma de contribucións e doazóns infinitamente solidarias e desinteresadas, tanto que superamos as expectativas. Respondéstedes de tal maneira que aquí deixo plasmado toda a miña admiración por ese espírito heroico que temos herdado das xacias ribeirás. Porque foi con ese espírito como a familia de Adega EDV, Transportes Celso Rodríguez desde Cea, Euforte Coaching, o Sindicato da Policía Nacional ou o Restaurante Marshall (ambos de Valencia), entre outros, axudaron a levar a esperanza alá onde se estende a nosa rede na Comunidade Valenciana.
Desde o punto de recollida de Radio Monforte, e cunha solidaria cadea humana, conseguimos levar cinco furgóns; en total, cargáronse 36 pallets en dous camións, máis outro furgón de apoio. A expedición estivo acompañada por dous membros do Corpo Nacional de Policía para acceder ás zonas afectadas, e alí esperaba un garda civil de Monforte para levalos a puntos concretos e facer directamente a entrega aos afectados segundo as súas necesidades.
Nas instalacións de Radio Monforte foron depositados e contabilizados máis de 4.000 litros de auga e leite, pallets de pañais de bebé e de adulto, que foi o primeiro que se pedía desde os propios lugares damnificados. A continuación, sumáronse alimentos e material escolar, lixía e numerosos quilos de productos de limpeza e hixiene persoal. Moitas desas caixas levaban escritas mensaxes de ánimo para os valenciáns.
A experiencia de axudar na recollida das vosas doazóns deixáronnos preciosas historias, como a da avoa que se acercou chorando cun paquete de caixas de mistos porque dicía que os ían necesitar; os novos pais que doaron os seus agasallos para os recén nados de Valencia; o apoio psicolóxico que recibimos de Euforte Coaching, a nai que traía doces e nocilla para a merenda dos nenos, o amante dos animais que trouxo comida para mascotas; os veciños que se unían a nós formando unha cadea para cargar os furgóns de EDV; ou a panadería que enviou unha boa variedade dos seus exquisitos pans da Ribeira Sacra. Pequenas historias que se foron tecendo a través desta rede de apoio.
En momentos duros é onde se ve que nesta terra somos un pobo bravo e heroico, unido por unha cultura solidaria que se manterá polo gran corazón das súas xentes.
Cargando ...
