O novo presuposto, que crece un 12%, reforza a mobilidade e as políticas sociais
A Deputación de Lugo aprobou o pasado martes no pleno celebrado no Pazo de San Marcos o Orzamento de 2025, que acadará os 130 millóns de euros, un incremento do 12% respecto ao ano anterior, impulsado polos fondos do Estado. A Deputada de Economía, Carmela López Moreno, destacou que este presuposto é “investidor, social e claramente expansivo”, incidindo na súa capacidade para achegar servizos públicos e fomentar a actividade económica, dous factores chave para fixar poboación.
O Presidente da Deputación, José Tomé Roca, afirmou que o documento permitirá seguir desenvolvendo os catro piares da acción de goberno: mobilidade, cooperación cos concellos, políticas sociais e apoio aos sectores produtivos. Tomé subliñou que o presuposto inclúe medidas ambiciosas para mellorar a calidade de vida na provincia e fortalecer a cohesión territorial.
INCREMENTO NAS POLÍTICAS SOCIAIS
Unha das partidas máis destacadas do orzamento é a destinada a políticas sociais, que ascende a 41,2 millóns de euros, un 8% máis respecto ao exercicio anterior. Este importe inclúe preto de 11 millóns para o mantemento das residencias de maiores de Trabada, Pol, Ribadeo, A Fonsagrada, Castroverde, Pedrafita do Cebreiro, Meira, Navia de Suarna e Ribas de Sil, así como para a apertura dos centros de Becerreá, Guitiriz e A Pontenova durante o actual mandato. Ademais, a Deputación destinará 3,4 millóns ao Servizo de Axuda no Fogar e manterá a teleasistencia domiciliaria.
Outros 1,4 millóns financiarán colaboracións con asociacións que traballan contra a pobreza e a exclusión social, mentres que as políticas de emprego recibirán 4 millóns para favorecer a contratación e a formación profesional. A educación contará con preto de 3 millóns, incluíndo apoios á Universidade pública e ao Centro de Formación Audiovisual da Deputación.
MELLORAS NA MOBILIDADE E COOPERACIÓN COS CONCELLOS
A mobilidade é outro dos grandes eixos do Orzamento, con máis de 27 millóns destinados a estradas, o que representa un incremento do 42% respecto ao 2024. Estes fondos permitirán acometer obras novas, conservación, desbroce e actuacións do Parque Móbil en vías provinciais e municipais. Carmela López destacou que esta aposta pola mobilidade busca fortalecer o equilibrio territorial, mellorar a conectividade no rural e dinamizar sectores como o turismo. O Plan Deputación, que promove a cooperación cos concellos, contará con 22 millóns de euros, garantindo un reparto transparente e obxectivo entre a totalidade dos concellos da provincia.
APOIO AOS SECTORES PRODUTIVOS
O orzamento para 2025 inclúe 13,4 millóns destinados aos sectores produtivos, cun incremento do 19% respecto ao exercicio anterior. A Granxa Gayoso Castro recibirá máis de 2 millóns de euros, dos cales máis dun millón será para construír unha nova granxa de porco celta, co obxectivo de recuperar esta raza autóctona e fomentar a transferencia de coñecementos en colaboración co Campus Terra. Esta infraestrutura ofrecerá espazos modernos para a formación e contribuirá á avaliación da Facultade de Veterinaria no Ránking de Shangai.
O turismo tamén será un eixo estratéxico, con 3,3 millóns para consolidar un modelo de turismo sostible e de experiencias, mentres que 3,8 millóns financiarán proxectos de conservación e valorización do patrimonio natural da provincia.
DECLARACIÓN INSTITUCIONAL E SOLIDARIEDADE
Durante a sesión plenaria, aprobouse por unanimidade unha declaración institucional en apoio aos afectados pola Dana de outubro, especialmente nas provincias de Valencia e Albacete. A Deputación destacou a importancia da unidade para afrontar esta catástrofe e agradeceu o traballo de servizos de emerxencia, voluntarios e organizacións implicadas.
Con este orzamento, dende o equipo de goberno da Deputación de Lugo queren reafirmar o seu compromiso co progreso social e económico, consolidando políticas expansivas que buscan mellorar a calidade de vida dos veciños da provincia.•
Cargando ...
