O veciño de Sober, Diego Xesús López, logrou o terceiro posto na categoría de Cervexa Experimental no VIII Concurso Homebrewer de Córdoba, celebrado o pasado 22 de novembro no Hotel Casa de los Azulejos. O certame, organizado polo club cordobés The Real CordobALE-CerveCataClub e enmarcado no Rally da Asociación de Cervexeiros Caseiros Españoles (ACCE), reuniu 18 xuíces certificados e consolidouse como unha das competicións cervexeiras máis prestixiosas de España.
Diego presentou unha cervexa negra elaborada en Sober, cunha mestura de características propias dunha imperial stout e dunha milk stout. Cun contido alcohólico de 7,2 graos, destaca polos seus aromas a café, sabor a chocolate e unha receita singular que inclúe cereais de chocolate Chocapic. Ademais, o seu coidado proceso de fermentación e maduración, que se estende durante cinco meses, foi clave no éxito da creación.
O mestre artesán, que participa nestes certames como afeccionado, confesou a súa sorpresa polo recoñecemento: “Non esperaba o premio porque o nivel é moi alto. Os participantes están moi formados, e moitos son xuíces titulados”. A súa cervexa, ideal para sobremesas ou como alternativa ao licor café, é adecuada para acompañar doces e tartas, especialmente en inverno, grazas á súa densidade e complexidade. Esta creación, coa que competiu en Córdoba, foi o terceiro lote que elaborou seguindo unha receita inicial que decidiu non modificar. Diego, docente de profesión, leva anos cultivando a súa paixón pola cervexa caseira na súa pequena bodega. No pasado, chegou a lanzar ao mercado dúas referencias comerciais, Chacueca e Mikado, en compañía dun grupo de amigos, pero decidiu non continuar coa comercialización debido á complexidade do mercado. “Para min, isto é unha afección”, comentou.
O VIII Concurso Homebrewer de Córdoba celebrouse con dous apartados principais: Estilos clásicos e Historical & Specialty. Na segunda categoría, que inclúe cervexas especiadas, ácidas ou experimentais, destacou a proposta de Diego Xesús, consolidando a calidade da cervexa artesá galega nun evento de referencia no sector.•
Cargando ...
