O Concello de Monforte de Lemos e a Confederación Hidrográfica Miño-Sil (CHMS) veñen de formalizar un convenio que permitirá a construción dunha senda peonil circular de máis de 4 quilómetros que transformará as marxes dos regatos das Malloadas, Penela e Zapardiel. Este proxecto, que contará cun orzamento de 4.125.000 euros, dos que a CHMS achegará o 80 % e o Concello o 20 %, está previsto desenvolver entre os anos 2025 e 2028.
A senda comezará no edificio de Correos e conectará diversos puntos clave como o Fogar San José e o Malecón, configurando un percorrido que abrazará a cidade, segundo destacou o alcalde, José Tomé Roca. A actuación tamén incluirá a restauración ambiental dos regatos, coa recuperación da vexetación ripícola e a naturalización dos seus cauces, ademais de resolver problemas históricos no saneamento que afectan á depuradora de Piñeira.
RECUPERACIÓN AMBIENTAL E CONEXIÓN URBANA
José Antonio Quiroga, presidente da CHMS, subliñou a relevancia da recuperación ambiental de tres regatos afluentes do río Cabe, mellorando os seus ecosistemas e integrándoos na trama urbana. A senda fluvial transcorrerá por unha das marxes dos regatos, aínda que nos tramos máis urbanos terá percorridos en ambas beiras. Ademais de unir espazos naturais como o Parque da Florida e o Zapardiel, o proxecto conectará zonas de alta densidade urbana co casco histórico, creando un círculo verde arredor da cidade.
“Este proxecto levará a natureza ao corazón de Monforte”, afirmou Quiroga, destacando que a senda estará deseñada para peóns e bicicletas, fomentando a práctica deportiva e o lecer.
SOLUCIÓNS PARA O SANEAMENTO
Un dos obxectivos clave do proxecto é solucionar as deficiencias do sistema de saneamento. Actualmente, as augas limpas do regato das Malloadas saturan os colectores da rede, dificultando o funcionamento da EDAR municipal. O novo trazado permitirá separar estas augas, mellorando a capacidade de depuración e reducindo o impacto ambiental.
O alcalde Tomé destacou que esta intervención representa un salto cualitativo para Monforte, combinando melloras urbanísticas, ambientais e de infraestrutura. O proxecto contempla a creación dun paseo de catro quilómetros, con zonas específicas de dobre beirarrúa en espazos máis urbanos, como na rúa Sarria.
UN ANTES E UN DESPOIS PARA MONFORTE
O convenio, que iniciará coa redacción do proxecto en 2025, reflicte un compromiso por parte do Goberno de España e da CHMS co desenvolvemento sostible da cidade. Tomé agradeceu a sensibilidade amosada pola CHMS en temas medioambientais e de saneamento, subliñando que o investimento permitirá “urbanizar, sanear e poñer en valor” zonas tradicionalmente esquecidas.
Con esta nova infraestrutura, Monforte consolidará un espazo integrado onde natureza, ocio e calidade de vida se darán a man, marcando un antes e un despois para a trama urbana da cidade.•
Cargando ...
