José Tomé destacou o impacto da nova infraestrutura, que estará operativa a principios de 2026, tras unha inversión total de 4 millóns de euros
O alcalde de Monforte de Lemos, José Tomé Roca, supervisou hoxe as obras da futura Comisaría da Policía Nacional, acompañado polo Delegado do Goberno en Galicia, Pedro Blanco, e o xefe superior da Policía Nacional de Galicia, Pedro Jesús Pacheco. Acompañaron tamén o acto a subdelegada do Goberno en Lugo, Isabel Rodríguez, a Tenente de Alcalde, Gloria Prada, o Concelleiro de Obras, José Luís Losada, e outros representantes das forzas de seguridade.
As obras, que avanzan a bo ritmo, convertiranse nunha solución ás carencias actuais das instalacións policiais en Monforte. Desde 1998, a comisaría local ocupa un antigo edificio residencial en réxime de alugueiro, con espazos insuficientes e sen garaxe, situación que dificultaba a operatividade do Corpo Nacional de Policía. Coa reforma en marcha, o novo edificio ofrecerá unhas instalacións modernas, funcionais e sostibles. Situada na Avenida de Galicia, número 73-77, a nova comisaría está a ser reformada na coñecida como «antiga Casa de Socorro», un inmoble cedido gratuitamente polo Concello de Monforte. O edificio, cunha superficie construída de 1.822 metros cadrados e unha parcela de 2.282 metros cadrados, contará con espazos específicos para atención cidadá, áreas de detención, vestiarios, zonas operativas e unha galería de tiro. A reforma inclúe melloras estruturais, como a instalación de escaleiras de emerxencia e un ascensor que garante a accesibilidade.
O proxecto foi licitado en decembro de 2023 cun orzamento inicial de 4,6 millóns de euros, sendo finalmente adxudicado por 3,67 millóns. A dirección das obras recae na firma técnica Unspyra Servicios Técnicos, cun contrato de 140.000 euros. A reconversión estará concluída a finais de 2025, co obxectivo de que a comisaría estea operativa a principios de 2026.
Na súa intervención ante os medios, José Tomé destacou que a obra responde a unha vella demanda da cidadanía, que levaba máis de 40 anos esperando por unha infraestrutura axeitada. “Estamos a dar solución a unha necesidade histórica do noso municipio grazas ao esforzo conxunto do Concello e o Goberno central. Esta nova comisaría fortalecerá a presenza policial e mellorará a calidade do servizo público para todos os veciños e veciñas de Monforte”, afirmou o alcalde.
O Delegado do Goberno, Pedro Blanco, agradeceu o compromiso do rexedor, salientando que “a cesión do edificio e da parcela foi clave para facer realidade esta dotación esencial”. Blanco subliñou ademais a rapidez coa que o Ministerio do Interior iniciou os traballos, garantindo unha infraestrutura adaptada ás necesidades actuais. O novo edificio marcará un cambio significativo na operatividade do Corpo Nacional de Policía en Monforte, substituíndo unhas instalacións obsoletas e mellorando a eficiencia dos servizos. A urbanización e acondicionamento da zona de aparcamento e a optimización dos espazos internos permitirá aos axentes traballar en mellores condicións, ao tempo que a comunidade local se beneficiará dun servizo máis accesible e moderno.•
Cargando ...
