A directora xeral de Ordenación e Innovación Educativa, Judith Fernández, visitou o Centro de Educación Especial Infanta Elena de Monforte de Lemos, un dos 107 centros que participan no Plan de Mellora de Bibliotecas Escolares (Plambe) no curso 2024/2025. Este plan ten como obxectivo mellorar a calidade do ensino e a atención á diversidade mediante o apoio ás bibliotecas escolares, facendo delas espazos dinámicos e innovadores para fomentar a lectura e ampliar as oportunidades de aprendizaxe.
Neste ano, catro novos centros na provincia de Lugo, entre os que se atopa o CEE Infanta Elena, recibirán formación específica e apoio técnico para a modernización das súas bibliotecas. Ademais, os 103 centros que renovan a súa participación tamén contarán con axudas para ampliar os seus fondos bibliográficos, mellorar os seus equipamentos e modernizar o mobiliario. No caso do centro monfortino, a Xunta destinou 10.000 euros desde 2022 para mellorar as súas instalacións.
O CEE Infanta Elena renovou a súa biblioteca escolar con novo mobiliario e integrouse ao programa de Clubs de Lectura para fomentar os hábitos lectores entre o alumnado. Durante a visita, Fernández destacou a importancia destas accións para mellorar a atención á diversidade, asegurando que “a lectura é unha ferramenta fundamental para a transformación educativa”. Ademais, o Plan tamén beneficia a centros de Pantón, como a Biblioteca do CEIP Plurilingüe Monte Baliño, que tamén participa nesta iniciativa. Dende a Xunta de Galicia detacan que continúan a traballar coa idea de apoiar as bibliotecas escolares, promovendo a súa renovación e dinamización para seguir mellorando o desenvolvemento académico e persoal do alumnado.•
Cargando ...
