O proxecto permitirá formación práctica de alto nivel, fomentará a investigación e fortalecerá o sector primario na provincia de Lugo
O Presidente da Deputación de Lugo, José Tomé Roca, anunciou que a institución provincial prevé licitar antes de que remate o ano a construción da granxa de porco celta no complexo da finca Gayoso Castro, situada en Castro de Rei. Cun orzamento de 1.057.000 euros, o proxecto cumpre o compromiso de ofrecer un servizo público esencial para o futuro do sector primario e a formación dos profesionais encargados de garantir a sostibilidade e a saúde animal.
A adxudicación das obras está prevista para o primeiro trimestre de 2025, co obxectivo de que as instalacións estean operativas en 2026. Segundo explicou Tomé, a granxa servirá como espazo de formación práctica para estudantes da Facultade de Veterinaria e enxeñeiros agrónomos do Campus Terra da USC, proporcionando un “laboratorio vivo” para desenvolver competencias clave. Ademais, o proxecto busca consolidar o prestixio internacional da Facultade de Veterinaria, que ocupa postos destacados no ránking de Shangai.
DETALLES DAS INSTALACIÓNS
A nova granxa contará cunha superficie edificada de máis de 1.000 metros cadrados e terá capacidade para 24 porcas de cría e 5 porcos reprodutores. O deseño inclúe unha nave de produción, onde se desenvolverán as distintas fases da actividade, unha zona de corentena para garantir a saúde animal, aularios, vestiarios, espazos de almacenaxe e catro silos para alimento. Tamén disporá de infraestruturas auxiliares, como depósitos de auga, un grupo electróxeno, unha fosa de purín, peches perimetrais e pistas de acceso.
Segundo destacou o Presidente, estas instalacións integraranse nas actividades xa en marcha en Gayoso Castro, como a crianza de xatas de raza rubia galega, a recría de gando vacún, a granxa experimental de leite, e a recuperación de razas autóctonas como a vaca cachena e os cabalos. O proxecto para o porco celta reforzará a conservación e mellora desta raza autóctona e ofrecerá novas oportunidades de formación.
UN COMPROMISO CO SECTOR PRIMARIO
José Tomé subliñou que esta iniciativa se enmarca no obxectivo de poñer a investigación, a formación e a innovación ao servizo do sector primario, clave para o desenvolvemento económico e social do rural. A Deputación busca así potenciar a produción de leite, carne e madeira, sectores nos que a provincia de Lugo é líder a nivel nacional.
Tomé resaltou que esta granxa permitirá non só fortalecer a economía rural, senón tamén reter talento novo, fixar poboación no rural e mellorar a posición da provincia no ámbito educativo europeo. “A agricultura e a gandería son as raíces da nosa economía, e como tal, merecen todo o noso apoio e esforzo”, afirmou.
CRÍTICAS Á FALTA DE APOIO AUTONÓMICO
O Presidente aproveitou para sinalar a ausencia dunha estratexia clara por parte da Xunta de Galicia para impulsar o medio rural. Segundo Tomé, a Deputación está asumindo este reto dentro das súas posibilidades e cos recursos dispoñibles, contando co apoio dos sectores produtivos e do coñecemento da Universidade.
“É responsabilidade das administracións públicas planificar o futuro con visión global e estratéxica, algo que a Administración autonómica debería liderar pero que non está a facer. Desde a Deputación de Lugo intentamos paliar esta falta de visión, desenvolvendo proxectos que beneficien ao sector primario e ao rural”, concluíu o mandatario provincial. •
Cargando ...
