A iniciativa ofrece descontos en catro balnearios da provincia e busca fomentar o benestar social e o turismo termal, cun orzamento incrementado nun 30% respecto á edición anterior
A Deputación de Lugo anunciou a apertura do prazo para participar na nova edición do programa Lugo Termal, que pon a disposición das persoas interesadas 1.750 prazas para tratamentos en balnearios da provincia. A iniciativa, que arrincou o pasado 2 de decembro está dirixida a maiores de 50 anos, que poderán beneficiarse de descontos de entre o 10% e o 20% en catro establecementos: Termas de Lugo, Augas Santas en Pantón, Río Pambre en Palas de Rei e o Balneario de Guitiriz. Ademais, os participantes poderán acudir cun acompañante que gozará das mesmas vantaxes, independentemente da súa idade.
O programa destínase a persoas empadroadas na provincia de Lugo, que sexan autónomas nas súas actividades cotiás e que non presenten contraindicacións para tratamentos termais. Para participar, será necesario rexistrar unha solicitude, dispoñible no Boletín Oficial da Provincia do pasado 30 de novembro e na sede electrónica da Deputación. As inscricións, acompañadas dunha copia do DNI, poderán realizarse a través da sede electrónica ou de calquera rexistro oficial, ata esgotar as prazas dispoñibles.
O programa Lugo Termal ofrece dúas modalidades. A primeira, con estancia, inclúe 6 días e 5 noites con pensión completa, recoñecemento médico, entre 15 e 20 técnicas termais, e actividades socioculturais por 275€. A segunda modalidade, sen estancia, permite recibir entre 30 e 40 tratamentos termais durante 10 días, cun custo de 150€. En ambos casos, os custos están parcialmente cubertos pola Deputación de Lugo, que nesta edición incrementou o orzamento ata os 121.605 euros, un 30% máis respecto ao ano anterior.
UNHA DÉCADA PROMOVENDO O TERMALISMO E A CALIDADE DE VIDA
O Lugo Termal, que leva máis dunha década en marcha, busca promover o envellecemento activo, a autonomía persoal e a detección precoz da dependencia entre os maiores da provincia. Tamén desempeña un papel destacado na dinamización da economía local, impulsando o turismo de proximidade. A provincia de Lugo, que conta cunha ampla tradición termal dende a época romana, é recoñecida pola calidade das súas augas mineiromedicinais. Galicia, ademais, sitúase como a segunda maior rexión termal de Europa.
CREACIÓN DE EMPREGO NO RURAL
A colaboración entre a Deputación e os catro balnearios participantes reflicte o compromiso coa preservación e promoción deste patrimonio único. Segundo a Asociación de Balnearios de Galicia, estas instalacións contribúen á creación de emprego no rural, especialmente feminino, e axudan a fixar poboación nestas áreas.
O Lugo Termal súmase ao conxunto de iniciativas da Deputación orientadas a mellorar a calidade de vida da veciñanza lucense, ao tempo que impulsa o turismo termal como motor económico. As persoas interesadas teñen a oportunidade de beneficiarse dunha proposta que combina saúde, lecer e benestar, nunha contorna natural privilexiada.•
Cargando ...
