A revista destaca o patrimonio, a arte e as paisaxes da comarca
National Geographic Historia inclúe no seu calendario de 2025 un percorrido polo patrimonio artístico, arquitectónico e paisaxístico da provincia de Ourense. Turismo de Galicia colabora nesta iniciativa para promover os atractivos da rexión e reforzar a súa proxección internacional.
A portada do calendario, titulado Ourense. Patrimonio, Arte e Paisaxe, está dedicada ao claustro do Mosteiro de Santo Estevo de Ribas de Sil. A publicación acompaña cada mes cunha fotografía principal e outra secundaria que destacan lugares emblemáticos, tradicións e elementos artísticos.
Xaneiro ábrese cunha imaxe do Pórtico do Paraíso da Catedral de Ourense, mentres que febreiro inclúe unha estampa da Ribeira Sacra e outra do Entroido. En marzo, o protagonista é o Castro de San Cibrao das Las, complementado cunha peza de cerámica. En abril e maio aparecen a Ponte e igrexa de Allariz e a xudería de Ribadavia, respectivamente.
Xuño reflicte o Cañón do Río Mao e os hórreos da Merca, mentres que xullo destaca o Mosteiro de Oseira. O mes de agosto céntrase na paisaxe do embalse do Lindoso, seguido en setembro pola igrexa de Santa María Madre e a fachada do Concello de Ourense.
Outubro fai unha homenaxe á cultura do viño co contorno dos ríos Cabe, Miño e Sil. En novembro, as imaxes escollidas son o mosteiro de Santa Cristina de Ribas de Sil e Nosa Señora das Ermidas, no Bolo. Decembro pecha cunha fotografía da nave principal da Catedral de San Martín de Ourense, resaltando a maxestuosidade deste templo.
Este calendario acompaña o número de decembro da revista.•
Cargando ...
