O Diario Oficial de Galicia (DOG) publicou o 12 de decembro a orde da Consellería do Medio Rural que establece as bases reguladoras das axudas para os investimentos na elaboración e comercialización de produtos vitivinícolas, financiadas polo Fondo Europeo Agrícola de Garantía (Feaga), e convoca a súa solicitude para o exercicio orzamentario de 2025.
Este programa de axudas anual destina un total de 11.400.000 euros, que se executarán entre os anos 2025 e 2027. As solicitudes estarán abertas dende mañá, 13 de decembro, ata o 31 de xaneiro de 2025, dando a oportunidade ás empresas e entidades do sector vitivinícola galego de acceder a financiamento para mellorar os seus procesos e adaptarse ás novas demandas do mercado.
As axudas teñen como obxectivo mellorar o rendemento global das empresas vitivinícolas galegas, promovendo a súa competitividade e sustentabilidade. Poden beneficiarse desta convocatoria as adegas, organizacións de produtores vitivinícolas, asociacións de produtores e organizacións interprofesionais do sector.
Un dos principais obxectivos destas subvencións é fomentar a agrupación das primeiras etapas da cadea alimentaria, así como a integración das entidades asociativas e o asociacionismo agrario. Ademais, promóvese a adopción de procesos sustentables, como o aforro enerxético, a eficiencia global e o uso de enerxías renovables, así como a valorización e tratamento de residuos.
A convocatoria tamén busca impulsar a innovación e a implantación de novos produtos e presentacións, fomentar a certificación ambiental das instalacións vitivinícolas e promover a produción ecolóxica, así como os produtos acollidos a réximes de calidade. Tamén se apoiarán investimentos en comercialización e a introdución de tecnoloxías dixitais nas empresas do sector.
A través destas axudas, poderán financiarse custos de construción, mellora ou adquisición de bens inmobles, compra de nova maquinaria e equipos, e gastos administrativos, entre outras opcións, sempre que os custos subvencionables non superen o 4% do total da operación.•
Cargando ...
