Luar Na Lubre elixiu Lugo para iniciar a xira de 2025, un percorrido especial que serve de preludio ao seu 40 aniversario en 2026. A banda galega presentará o venres 10 de xaneiro no Auditorio Gustavo Freire o seu traballo número 20, ‘Luar Na Lubre XX. Encrucillada’, un libro-disco que compila temas emblemáticos reinterpretados e recolle unha cronoloxía fotográfica e literaria da súa traxectoria. ‘Encrucillada’ inclúe testemuños de máis de 60 figuras da música, literatura e xornalismo, ademais de novas versións de cancións que marcaron a historia do grupo. Este proxecto, que será o último editado en formato físico, celebra o legado de Luar Na Lubre, que acadou dous Discos de Ouro, nove Premios da Música e levou o folk galego por máis de 50 países.
Formado na Coruña en 1986, o grupo está composto por Bieito Romero, Cristina López, Nuria Naya e outros recoñecidos músicos que manteñen viva a música tradicional galega con toques de modernidade.•
Cargando ...
