O Concello de Monforte de Lemos abriu o prazo de inscrición para dous obradoiros interxeracionais que se celebraran no marco do Programa Activa 2024-2025. Estas actividades, dirixidas a avós e netos empadroados no municipio, buscan reforzar os vínculos familiares e fomentar a aprendizaxe compartida entre xeracións, ofrecendo unha proposta gratuíta para fomentar a participación cidadá e o enriquecemento mutuo.
O primeiro deles, o Obradoiro interxeracional AV@S 3.0, terá lugar os días 23 e 26 de decembro, de 11:00 a 13:00 horas, na planta baixa do Centro Cívico Social. Esta actividade persegue un dobre obxectivo: fortalecer as relacións entre avós e netos e contribuír á alfabetización dixital das persoas maiores grazas aos coñecementos dos máis novos. Os participantes aprenderán a empregar ferramentas como o correo electrónico, os buscadores ou o tratamento de fotografías, imprescindibles para comunicarse e interactuar na actualidade. Este obradoiro está dirixido a avós e avoas con netos de entre 8 e 16 anos e conta cun límite de oito prazas dobres. Ademais de promover as habilidades tecnolóxicas nos maiores, foméntase tamén nos rapaces hábitos de responsabilidade e implicación.
A segunda proposta é o Obradoiro interxeracional de manualidades navideñas, que se celebrará o 23 de decembro, no mesmo horario, na segunda planta do Centro Cívico Social. Esta actividade está enfocada na creación de decoracións típicas destas datas, fomentando o traballo en equipo e a cooperación entre as diferentes xeracións. Está dirixida a avós e netos de idades comprendidas entre os 6 e os 16 anos, sendo tamén gratuíta e contando cun límite de oito prazas dobres.
Para participar, é necesario cumprir determinados requisitos, como estar empadroado no Concello de Monforte e acreditar a relación de parentesco en segundo grao entre avós e netos. Ademais, no caso do Obradoiro AV@S 3.0, requírese dispor dun teléfono móbil con sistema Android.
Con estas iniciativas, o Executivo local busca non só ofrecer opcións de lecer, senón tamén promover a inclusión dixital e fortalecer os lazos comunitarios, reafirmando o compromiso co benestar e a calidade de vida dos seus veciños.•
Cargando ...
