O pasado sábado celebrouse en Montefurado, unha visita comentada ao túnel romano, organizada pola Xunta de Galicia. O arqueólogo Luís Francisco López González foi o encargado de guiar aos asistentes pola contorna deste enclave histórico, que destaca polo seu valor arqueolóxico e paisaxístico.
A actividade enmárcase no programa de actuacións do Xeoparque Mundial da UNESCO Montañas do Courel e contou cunha boa participación de público. Durante a visita, explicouse a relevancia do túnel, construído na época romana para desviar o caudal do río Sil e facilitar a extracción de ouro. É unha das mostras máis destacadas de enxeñería mineira romana no noroeste peninsular, conserva 52 metros dos 120 orixinais, xa que sufríu diversos derrubamentos ao longo dos séculos.
Nos últimos meses, a Consellería de Cultura, Lingua e Xuventude levou a cabo obras de mellora no acceso e miradoiro do túnel, cun investimento de preto de 17.000 €. Estas actuacións incluíron a reparación das varandas, a regularización do terreo e a sinalización de espazos como o aparcadoiro e o inicio do sendeiro. No miradoiro instalouse unha varanda máis próxima ao cantil, que permite unha mellor perspectiva do túnel.
O acondicionamento realizouse baixo a supervisión de técnicos da Xunta de Galicia e do propio arqueólogo Luís Francisco López, quen destacou a importancia de preservar este patrimonio único, integrado na paisaxe da Ribeira Sacra e recoñecido como Ben de Interese Cultural.•
Cargando ...
