O Auditorio Municipal acollerá este domingo un concerto único coa banda Óscar Ibáñez & Tribo
O Auditorio Municipal de Quiroga será escenario este domingo, 19 de xaneiro, dun concerto especial do recoñecido gaiteiro e flautista Óscar Ibáñez, que celebrará o 20 aniversario da súa traxectoria artística. O espectáculo, titulado TRIBAL XX, reúne novas creacións e pezas destacadas dos seus traballos discográficos, nunha viaxe sonora marcada pola orixinalidade e a imaxinación, onde a sonoridade celta é protagonista.
Acompañado pola súa banda, Óscar Ibáñez & Tribo, o músico combina melodías tradicionais galegas con influencias doutros xéneros europeos e americanos, enriquecendo cada peza con variacións modernas e unha linguaxe actual. A formación inclúe recoñecidos artistas como Suso Iglesias no acordeón, Paula Gómez no violín, Xosé Liz ao bouzouki, Paco Dicenta no baixo, Leandro Deltell en batería e percusión, Teresa Gómez na zanfona e Carla Villanueva no xilófono, ademais de 6 gaiteiros da Banda de Gaitas Suevia de Porto do Son.
Óscar Ibáñez & Tribo ten actuado en máis de 250 concertos por Europa e participado nos principais festivais internacionais de música folk, sendo esta unha oportunidade única para desfrutar dunha proposta dinámica e enérxica.
Organizado polo Concello de Quiroga e patrocinado pola Xunta de Galicia, o concerto, con entrada de balde, dará comezo ás seis da tarde no Auditorio Municipal.
Cargando ...
