A Consellería de Economía e Industria, a través do Igape, publicará o 17 de xaneiro unha nova convocatoria de axudas para startups. Esta liña, que repite por segundo ano, contará cun orzamento de 1,5 millóns de euros, destinado a financiar o 100 % dos gastos ou investimentos de proxectos innovadores en fase de lanzamento ou consolidación. As achegas, por concorrencia non competitiva, oscilarán entre os 10.000 e os 20.000 euros.
En Galicia existen actualmente 311 startups, que empregan 2.662 persoas e facturan máis de 241,2 millóns de euros, segundo o informe nacional “Empresas Tech e Innovadoras”. As cidades de Vigo, A Coruña e Santiago concentran o maior número de iniciativas, seguidas de Lugo, Nigrán e Pontevedra. Os sectores predominantes son biotecnoloxía, saúde, software, turismo e enerxías renovables, entre outros.
Ademais das axudas, as startups contan co apoio da rede de aceleradoras da Xunta, que recibirá este ano un investimento de 7 millóns de euros. A rede, composta por iniciativas como BFAuto, BFFood e Climatech, vai ampliarse con tres novas aceleradoras enfocadas na saúde, o deporte e as enerxías renovables. Ata o momento, este ecosistema innovador apoiou máis de 830 proxectos e impulsou 1.400 postos de traballo cualificados en Galicia.
A través do Igape, a Xunta quere dar maior pulo ao emprendemento innovador.•
Cargando ...
