Presentou ao pleno provincial propostas para reforzar a atención á dependencia e opoñerse ao proxecto industrial en Palas de Rei
A Deputación de Lugo instou á Xunta de Galicia a incrementar a aportación ao Servizo de Axuda no Fogar (SAF), pasando de 12 a 20 euros por hora, e a reforzar os equipos de valoración da dependencia. A proposta, impulsada polo BNG, foi aprobada no pleno provincial celebrado este martes. Durante a sesión, destacou o deterioro do servizo, cunha espera media de 378 días para tramitar a dependencia, e a insuficiencia de recursos para os concellos.
A voceira nacionalista, Iria Castro, sinalou que o actual financiamento é insostible e recalcou a presión que soportan as traballadoras sociais e as do SAF, “que desenvolven un labor crucial en condicións precarias”. Ademais, criticou o voto en contra dos deputados do Partido Popular, cualificándoo de “deslealdade cara aos seus propios concellos e ás familias usuarias”. Castro lembrou tamén os recortes aplicados polo goberno de Mariano Rajoy e acusou á Xunta de eludir a súa responsabilidade, afirmando que 2.703 maiores continúan esperando valoración.
Nun segundo punto da orde do día, o pleno tratou unha moción presentada polo BNG para ratificar o rexeitamento da Deputación ao proxecto de construción da macrofactoria de celulosa de Altri en Palas de Rei. O vicepresidente da Deputación, Efrén Castro, destacou o impacto negativo que a planta podería ter no medio natural e no patrimonio, así como a oposición cidadá manifestada en Santiago de Compostela, nunha protesta convocada polos colectivos Ulloa Viva e Plataforma en Defensa da Ría de Arousa.
Castro lamentou que PP e PSOE non apoiasen a moción e reivindicou a mobilización democrática como un reflexo do rexeitamento social á industria de enclave que, segundo afirmou, responde a intereses económicos alleos aos do territorio.•
Cargando ...
