O pasado mes de decembro, o Consorcio de Turismo Ribeira Sacra celebrou a súa última sesión plenaria do 2024 no Concello de Chandrexa de Queixa, onde se aprobaron por unanimidade varios asuntos clave para o desenvolvemento do destino. Entre as decisións tomadas, destaca a aprobación do orzamento para o exercicio 2025, que ascende a 220.400 €, unha contía que se verá complementada polos fondos do Plan de Sostibilidade 2020-2025 e o novo Plan 2024-2026, cunha achega de 2 millóns de euros para promover o desenvolvemento sostible en varios eixos.
A sesión tamén deu luz verde a tres contratos importantes, incluíndo a contratación dun servizo para o acondicionamento dunha rúa en Quinta do Monte, no Concello de Esgos, que forma parte das actuacións de embelecemento de núcleos do Plan de Sostibilidade. O valor estimado desta obra ascende a 24.793,39 €.
Tamén se aprobou a contratación de dous técnicos en turismo para apoiar as tarefas do Consorcio, cun orzamento de 75.000 € para o período de 17 meses. Outro dos puntos tratados foi o proxecto piloto de sinalización intelixente en Ribeira Sacra, que inclúe a creación dunha aplicación móbil para mellorar o acceso aos recursos turísticos da zona, cunha licitación de 39.876,03 €.
Ademais, informouse sobre as xestións co Bispado de Lugo para mellorar a accesibilidade ás igrexas románicas da zona, e sobre a concesión dunha subvención para o proxecto «Estratos na terra», que busca preservar as técnicas tradicionais de construción na Ribeira Sacra.
O alcalde de Chandrexa de Queixa deu a benvida aos asistentes, destacando a importancia de que o seu concello forme parte deste consorcio. A sesión finalizou cun xantar e brindis de Nadal, con todos os membros do Consorcio.•
Cargando ...
