A conselleira do Medio Rural, María José Gómez, visitoua pasada semana a Ecogranxa Teijeiro, situada no concello do Incio, destacando o seu papel como referente na potenciación do rural galego. Acompañada polo alcalde do Incio, Héctor Corujo, e polo delegado territorial da Xunta en Lugo, Javier Arias, felicitou aos responsables desta iniciativa, considerada a maior granxa de porco celta inscrita en Asoporcel.
Durante a visita, a conselleira subliñou a capacidade do proxecto para aproveitar os recursos propios do rural, fomentando a crianza dunha raza autóctona como é o porco celta. Ademais de promover a gandaría en extensivo e a gastronomía, esta granxa impulsa actividades complementarias no medio natural, como opcións lúdicas, deportivas e culturais. O proxecto destaca, segundo Gómez, pola súa capacidade para transformar o territorio e fomentar unha experiencia integral no rural.
Outro aspecto salientado pola conselleira foi a recuperación de terras lograda grazas á unificación de case 30 parcelas, pertencentes a propietarios de diferentes continentes, ata conformar unha superficie de 20 hectáreas. Este feito converte a Ecogranxa Teijeiro na explotación de maior extensión dedicada ao porco celta en Galicia.
A modernización e a tecnoloxía son outros dos sinais de identidade desta granxa, que conta cun innovador sistema de recollida de xurros. María José Gómez subliñou que proxectos como este contribúan á dinamización do rural e á fixación de poboación, dous obxectivos fundamentais para a Xunta de Galicia.
En referencia ao apoio institucional, a conselleira recordou que o titular da Ecogranxa se beneficiou de axudas concedidas pola Consellería do Medio Rural, tanto para a incorporación ao agro como para a mellora da explotación, cunha contía próxima aos 125.000 euros. Ademais, lembrou que este mes de xaneiro permanece aberta unha nova convocatoria de axudas para o fomento de razas autóctonas gandeiras, dotada cun orzamento de 220.000 euros.
“Este é o rural que queremos e polo que apostamos dende a Xunta de Galicia”, asegurou Gómez, quen destacou o compromiso do Goberno galego cunha Galicia viva, moderna e sustentable, reafirmando o apoio ás iniciativas que potencian os recursos endóxenos do territorio.•
Cargando ...
