A líder do PP de Monforte, Katy Varela, criticou duramente o ton optimista do alcalde José Tomé, quen cualificou o 2024 como un ano especial e anticipou un 2025 mellor. Para Varela, estas declaracións son “desacertadas” e denunciou que Tomé “se atribúe méritos alleos”, en referencia á mellora nos datos de censo e desemprego. Sinalou que, durante o seu mandato, o alcalde ignorou cuestións clave como a ampliación de prazas en gardarías municipais, un problema que obrigou moitas familias a recorrer a municipios veciños. Ademais, lamentou que investimentos prometidos continúan atrasados, mencionando que os problemas de saneamento e roturas de tubaxes persistiron sen solución.
Varela tamén destacou a crise económica do municipio, afirmando que negocios emblemáticos continúan pechando e que a falta de apoio do goberno local impide a apertura de novas iniciativas. “A cidade está chea de locais baleiros e casas en ruínas, mentres seguimos agardando pola implantación de empresas prometidas durante a última campaña electoral”, engadiu.
Desde o BNG, Emilio Sánchez sumouse ás críticas ao goberno local. O voceiro nacionalista, en recentes declaracións aos nosos compañeiros de Onda Cero, cualificou o 2024 como un ano sen novidades destacables, reducido a eventos como o Festival do Viño, a Feira Medieval e as Festas Patronais, cun gasto superior ao millón de euros. Sánchez reclamou proxectos máis económicos e orixinais, criticando a falta de investimentos en infraestruturas, que a cidade non teña PXOM e que o equipo de goberno siga obceda coz zona D, ou o a falta de selado de vertidos ao río Cabe.
Aínda que valorou positivamente os 10 millóns para a renovación de tubaxes, Sánchez denunciou que o bus segue sendo discriminatorio ao non cubrir varias zonas da cidade. Lamentou a ausencia de zonas de baño públicas. Para Sánchez, o goberno amosa un excesivo triunfalismo que non se reflicte na mellora da calidade de vida dos veciños.•
Cargando ...
