A Consellería de Vivenda e Planificación de Infraestruturas licitou a execución dunha glorieta no quilómetro 12+780 da estrada LU-903, en Doade, cun orzamento de 367.953 euros. O delegado territorial da Xunta, Javier Arias, visitou o lugar onde se desenvolverán as obras, destacando que o obxectivo é substituír a actual intersección en cruz por unha glorieta que permita unha circulación máis segura e fluída.
A licitación publicouse na Plataforma de Contratos Públicos de Galicia, e as empresas interesadas poderán presentar ofertas ata o 27 de xaneiro. Segundo a Xunta, as obras poderían iniciarse este ano, dado que o levantamento das actas previas ás expropiacións tivo lugar o pasado 11 de decembro, mentres que as actas de ocupación formalizaranse o 23 de marzo. A execución, cun prazo de seis meses, suporá un investimento total de preto de 410.000 euros.
DETALLES DA ACTUACIÓN
A nova glorieta, que contará cun diámetro de 28 metros, permitirá unha regulación funcional e segura da intersección actual, reducindo tamén a velocidade na contorna. A obra incluirá a continuación das beirarrúas existentes cara á marxe dereita da LU-903 e a vía provincial, así como gabias transitables de seguridade de entre 1 e 1,5 metros de ancho nos treitos sen beirarrúa.
ILUMINACIÓN E SINALIZACIÓN
Ademais, instalaranse sistemas de drenaxe para canalizar as augas pluviais, 14 luminarias LED para mellorar a iluminación, e letras co nome do concello na rotonda. A actuación completarase coa sinalización vertical e horizontal, balizamento e barreiras de seguridade, reforzando o compromiso da Xunta coa mellora das infraestruturas na comarca.•
Cargando ...
