A Consellería do Medio Rural está a reforzar o seu compromiso coa conservación da paisaxe e a loita contra a erosión nos viñedos da Ribeira Sacra mediante unha liña de axudas directas dotada con 2 millóns de euros. Así o destacou a conselleira María José Gómez nun acto celebrado a pasada semana en Sober, acompañada pola directora xeral da Axencia Galega de Desenvolvemento Rural, Paz Rodríguez.
Estas achegas, convocadas o 30 de decembro, diríxense a viticultores inscritos na Denominación de Orixe Ribeira Sacra, co obxectivo de preservar os socalcos e evitar o abandono de cultivos que definen a paisaxe da zona. A contía máxima é de 2.000 euros por hectárea para cultivos en socalcos de pedra non mecanizados, e de 1.000 euros para aqueles con traballo mecanizado, cun límite de 50.000 euros por beneficiario.
Ademais, o paquete inclúe medidas para paliar a crise xerada polos excedentes de viño debido ao descenso do consumo de viño tinto a nivel internacional. Neste contexto, a Xunta de Galicia activou unha partida de fondos propios para apoiar a destilación de crise nos viñedos da Denominación de Orixe Ribeira Sacra, permitindo liberar capacidade nas adegas de cara á vendima de 2024.
Outro dos eixos destacados foi a divulgación das oportunidades da Política Agraria Común (PAC), que ofrece axudas adaptadas a cultivos en pendentes. Actualmente, só o 28% dos viticultores da Ribeira Sacra solicitan estas achegas, polo que a Xunta busca ampliar a formación e información sobre este programa.
Tamén se subliñou a importancia do apoio económico para a recollida de uva, a través dunha liña de préstamos xestionada polo Igape, que na última convocatoria resolveu 38 solicitudes, achegando máis de 17 millóns de euros en créditos e un investimento final de 1,8 millóns.
A Consellería do Medio Rural María José Gómez destacou que este conxunto de accións reflicte a aposta do Goberno galego pola protección da paisaxe, o apoio aos viticultores e a dinamización económica dunha zona tan singular como a Ribeira Sacra.•
Cargando ...
