Os menores de 36 anos, cunha fonte regular de ingresos, poderán solicitar o Bono Emancípate, unha liña de apoio para sufragar os primeiros gastos do fogar como a compra de mobiliario e outros artigos
A partir do 6 de febreiro, as persoas menores de 36 anos con ingresos regulares poderán solicitar o Bono Emancípate, unha axuda que facilitará os primeiros gastos derivados da independencia, como a adquisición de mobiliario e outros artigos do fogar.
O prazo permanecerá aberto ata o 30 de abril, salvo que se esgote antes o orzamento de 2 millóns de euros asignado a esta iniciativa.
O programa contempla dous tipos de apoio segundo a situación residencial da persoa solicitante. Para quen resida nun inmoble de alugueiro, a axuda ascenderá a 1.500 euros, mentres que para aqueles que adquirisen unha vivenda en propiedade, a contía será de 3.000 euros. Esta medida compleméntase con outras iniciativas dirixidas a facilitar o acceso á vivenda, como as subvencións para a compra de inmobles protexidos ou a promoción de vivendas colaborativas para menores de 36 anos.
REQUISITOS PARA ACCEDER AO BONO EMANCÍPATE
Poderán beneficiarse desta axuda as persoas de entre 18 e 35 anos, con nacionalidade española ou dalgún Estado da Unión Europea ou do Espazo Económico Europeo. No caso de cidadáns extracomunitarios, deberán atoparse en situación de residencia regular en España.
Desde o punto de vista económico, os solicitantes terán que acreditar unha fonte regular de ingresos. No caso das unidades de convivencia, a suma total das rendas anuais non poderá superar catro veces o IPREM (Indicador Público de Renda de Efectos Múltiples), mentres que para persoas individuais o límite será de tres veces o IPREM.
Existen condicionantes específicos no caso de persoas con discapacidade.
Ademais, todos os integrantes da unidade de convivencia deberán estar empadroados na vivenda en que residan, ben sexa alugada ou en propiedade. Para os contratos de alugueiro, estes deberán ter unha vixencia mínima dun ano con posterioridade a maio de 2024.
FUNCIONAMENTO DA AXUDA
As persoas beneficiarias recibirán o importe da axuda a través dunha tarxeta moedeiro virtual expedida ao seu nome, que terá validez ata o 31 de decembro de 2025. Esta tarxeta permitirá realizar compras en establecementos comerciais, grandes superficies, empresas de mudanzas, xestorías e notarías con sede en Galicia. Non será válida para compras en liña nin en comercios fóra da comunidade autónoma.•
Cargando ...
