O Diario Oficial de Galicia (DOG) recolle a convocatoria das axudas para o sector apícola en 2025, cun orzamento de 1,4 millóns de euros. O obxectivo destas achegas é impulsar a modernización das explotacións, fomentar a innovación e mellorar a comercialización dos produtos apícolas, contribuíndo á protección da biodiversidade.
As axudas, cofinanciadas polo Fondo Europeo Agrícola de Garantía (Feaga), o Ministerio de Agricultura e a Administración autonómica, permitirán subvencionar investimentos en asesoramento técnico, formación, loita contra enfermidades das colmeas, adquisición de software e equipos de monitorización, envasado e etiquetaxe, así como accións de promoción e sensibilización sobre a calidade dos produtos apícolas.
As persoas físicas ou xurídicas titulares de explotacións apícolas, así como agrupacións de apicultores, poderán presentar as súa solicitudes durante un mes a partir do día seguinte á publicación da orde no DOG. Os investimentos subvencionables deberán realizarse entre o 1 de agosto de 2024 e o 31 de xullo de 2025.
Durante unha visita á explotación Mel Casa Miranda, no concello de Baleira, a conselleira do Medio Rural destacou a importancia da apicultura para o equilibrio ambiental e puxo en valor estas axudas como ferramenta para fortalecer a competitividade do sector. Ademais, subliñou a necesidade de seguir promovendo o traballo dos apicultores galegos e o seu papel fundamental na conservación dos ecosistemas rurais.•
Cargando ...
