Dende o mércores Galicia está a sufrir os efectos da borrasca Ivo, que xerou numerosas incidencias debido ás fortes rachas de vento e as intensas precipitacións que afectaron a toda a comunidade. Os seus efectos tamén se deixaron notar no sur de Lugo, aínda que que nosa comarca afortunadamente non foi das máis afectadas. Bo exemplo dos danos que está a causar é o feito de que ao redor de 2.000 persoas quedaron sen luz en diversas zonas de Galicia, sendo a situación máis crítica na provincia de A Coruña, pero tamén na Mariña lucense e algunhas comarcas do interior galego.
O temporal comezou a desatarse de forma notable desde o pasado domingo, cando a bomboxénese Herminia deixou unha serie de danos considerables, entre eles a caída de árbores e postes eléctricos, que provocaron apagóns en numerosas vivendas. Dende o mércores, con Ivo xa presente, as rachas de vento chegaban aos 100 km/h en zonas costeiras, mentres que as precipitacións intensas tamén afectaban a outras áreas de Galicia, deixando incluso neve en zonas de interior por encima dos 800 metros de altura.
A pesar de que a Aemet prevía que a borrasca Ivo tería efectos menos intensos, as incidencias seguen a crecer. A maior parte dos danos nas infraestruturas eléctricas foron ocasionados pola caída de árbores e os fortes ventos, que provocaron cortes no suministro eléctrico. A compañía Naturgy mobilizou todos os seus recursos e equipos de traballo para restablecer a luz aos afectados, cunha cifra de máis de 500 persoas traballando na reparación das avarías. O servizo de enerxía continúa en “estado de alerta”, co apoio de 50 grupos electrógenos temporais.
Na zona sur de Lugo, as comarcas de Sarria, Monforte, Chantada e Quiroga tamén sufriron os efectos dos temporais, con varios incidentes relacionados coas condicións meteorolóxicas adversas.
A Xunta de Galicia activou alertas para toda a costa galega debido ás malas condicións no mar. Os servizos de emerxencias recordaron á poboación a importancia de seguir as indicacións das autoridades e evitar os paseos marítimos e as actividades náuticas. Na madrugada do xoves, data de peche deste xornal, agárdanse ondas de máis de 8 metros no litoral norte e fortes ventos que afectarán a toda a zona costeira.
A alerta tamén se mantén para o interior da comunidade, onde as zonas montañosas de Lugo e Ourense se atopan en alerta amarela debido aos fortes ventos e a previsión de neve. A situación meteorolóxica segue a ser de risco, polo que a recomendación é estar atento ás advertencias e evitar desprazamentos innecesarios. •
Cargando ...
