O BNG apoia as queixas do Concello pero pide esgotar as vías legais, mentres que o PP critica a actuación do alcalde
A situación da Rúa Chantada en Monforte segue a xerar controversia entre os distintos grupos políticos do municipio. O BNG manifestou o seu apoio ás críticas do goberno local pola actuación da Xunta de Galicia na LU-617, cualificándoa de insuficiente e de mala calidade. Non obstante, insistiu na necesidade de esgotar todas as vías administrativas e legais para que sexa a Administración autonómica a que asuma a súa responsabilidade e execute as melloras necesarias sen custo para as arcas municipais.
O responsábel local do BNG, Manuel Luaces, fixo un chamamento á Xunta para que corrixa os defectos da obra e garanta que a rúa quede en boas condicións. Ao mesmo tempo, pediu ao goberno municipal que continúe a reclamar a implicación da Xunta, asegurando que contará co apoio do BNG para estas reivindicacións. Tamén advertiu que asumir os custos desde o Concello podería sentar un precedente negativo que afectase outros investimentos prioritarios para Monforte.
Pola súa banda, o Grupo Municipal do PP cargou duramente contra o alcalde, José Tomé, pola carta enviada aos domicilios de Monforte denunciando a situación da rúa Chantada. A voceira popular, Katy Varela, tachou este feito de «espectáculo bochornoso» e considerou «eticamente discutible» remitir unha misiva deste tipo aos veciños, ademais de facela chegar á Consellería de Infraestruturas e ao presidente da Xunta.
Os populares acusan a Tomé de intentar boicotear os traballos demorando a autorización da obra e lembran que a responsabilidade do mantemento do firme nos tramos urbanos corresponde ao propio Concello. Varela instou ao alcalde a solicitar a titularidade da vía se considera que a actuación da Xunta foi insuficiente. Asegurou que o mal estado da Rúa Chantada e da Rúa Morín débese ás roturas das tubaxes de auga, responsabilidade municipal.
O PP preguntou no pasado pleno polo custo do envío masivo da carta do alcalde e instará a que remita outra misiva informando das medidas previstas para renovar as tubaxes e mellorar o abastecemento e saneamento nos puntos do municipio que carecen destes servizos.•
Cargando ...
