Foto RTMQ.
A XXV Mostra do Aceite de Quiroga celebrarase os días 29 e 30 de marzo cunha programación especial polo seu 25 aniversario. Como novidade, desenvolverase o II Congreso do Aceite de Oliva de Quiroga e ampliaranse os espazos de celebración. O evento conta coa organización do Concello de Quiroga, produtores de aceite e técnicos municipais, que buscan poñer en valor este produto tradicional.
O sábado 29 terá lugar o congreso no Auditorio Municipal, con especialistas do sector que abordarán diversos aspectos do aceite de oliva a nivel nacional. A xornada concluirá cunha degustación de pinchos elaborados con aceite quirogués. O domingo, a feira trasladarase á praza do Auditorio Municipal, onde estarán situados os postos de venda e se realizarán diversas actividades no Museo Etnográfico, o Albergue Municipal e o propio Auditorio.
Os visitantes poderán coñecer o proceso tradicional de produción no Muíño de Aceite de Bendilló, que permanecerá en funcionamento. Para facilitar o acceso, haberá un servizo de autobuses gratuítos entre Quiroga e o muíño, con saídas cada hora entre as 11:00 e as 14:00 horas.
Outra das novidades deste ano será o primeiro pregón da mostra, no que se destacarán as cualidades do aceite de Quiroga. Tamén terá lugar un showcooking, onde se explicará a elaboración de distintos pratos con aceite da zona.•
Cargando ...
