O autobús urbano de Monforte acadou en 2024 un total de 82.580 usuarios, segundo os datos facilitados polo Concello. Esta cifra supón un incremento significativo respecto de anos anteriores e consolida o servizo como unha referencia no transporte da localidade.
A comparativa cos exercicios previos reflicte un crecemento continuo. En relación a 2023, o aumento foi dun 20,27%, ao rexistrar 13.923 pasaxeiros máis. Se se toma como referencia 2022, o crecemento situouse no 29,38%, con 18.756 viaxeiros adicionais. En comparación con 2021, cando o servizo contou con 52.685 usuarios, o incremento ascendeu ao 56,75%, cunha suba de 29.895 persoas. Desde 2019, ano previo á posta en marcha da gratuidade, o número de usuarios multiplicouse por máis de cinco, pasando de 14.422 a 82.580, o que representa unha suba do 472%.
Segundo os datos da empresa concesionaria, o mes de outubro de 2024 foi o de maior demanda do servizo, con 8.519 viaxeiros, seguido de novembro, con 8.050. Os meses de abril, maio e outubro acadaron por primeira vez cifras superiores aos 8.000 usuarios mensuais.
O autobús urbano de Monforte é un caso único en Galicia que comezou a funcionar o 1 de febreiro de 2020 como un servizo gratuíto, accesible e adaptado. Desde entón, captou a atención de outros concellos e medios de comunicación, que destacaron o seu impacto na mobilidade local. Dende o Concello sinalan que manteñen o seu compromiso co fomento do transporte público, con axudas para estudantes universitarios e de ciclos formativos, así como para o transporte escolar nos colexios da cidade.•
Cargando ...
