O Consello Regulador participou por primeira vez nesta feira exhibindo 39 viños de 14 adegas da comarca
Do 3 ao 5 de febreiro, o Consello Regulador da Denominación de Orixe Ribeira Sacra participou na Barcelona Wine Week (BWW), celebrada no recinto Montjuïc de Fira de Barcelona. Esta foi a primeira vez que o Consello asistiu a este evento de referencia do sector vitivinícola.
A D.O. Ribeira Sacra contou cun stand propio no que se exhibiron 39 viños procedentes de 14 adegas, distribuídos en 8 brancos, 1 rosado e 30 tintos. Ademais, varias adegas da denominación participaron con stands individuais, ampliando a representación dos viños da Ribeira Sacra na feira.
A Consellería do Medio Rural apoiou esta presenza a través da Axencia Galega da Calidade Alimentaria. O director da Axencia, Martín Alemparte, asistiu á inauguración da feira, destacando a importancia deste tipo de eventos como escaparate para presentar e promocionar as elaboracións vitivinícolas galegas a nivel nacional e internacional.
A Axencia estivo presente na BWW con 45 industrias de viños e augardentes agrupadas baixo a marca Galicia. No expositor da Consellería participaron as D.O. Rías Baixas, con 24 adegas; a D.O. Ribeiro, con cinco; a D.O. Ribeira Sacra, con oito; e unha adega da D.O. Valdeorras. Ademais, habilitouse un túnel do viño con caldos das cinco denominacións de orixe galegas e dous postos dedicados aos produtos das Indicacións Xeográficas Protexidas de Augardentes e Licores Tradicionais de Galicia.
Durante a feira, Martín Alemparte mantivo encontros estratéxicos co director do Instituto Catalá da Viña e o Viño, Joan Gené, e con Xoán Luis Elorduy, da Estación Viticultura e Enoloxía de Reus, para afondar na cooperación entre Galicia e Cataluña no sector vitivinícola. Tamén participou na reunión da xunta directiva da Plataforma Tecnolóxica do Viño, da que a Axencia é socia, centrada en establecer estratexias comúns de I+D+i para o sector en España.
A Barcelona Wine Week consolidouse como o evento enolóxico de referencia en España. Participaron máis de 1.100 expositores e 75 denominacións de orixe de todo o país, un 16% máis que en 2024, nun espazo de preto de 10.000 metros cadrados. O evento contou cun programa de actividades que incluíu catas, debates e encontros con expertos do sector, cunha previsión de 24.000 asistentes.
A participación do Consello Regulador na BWW permitiu achegar os viños da Ribeira Sacra a novos mercados e públicos, aproveitando a plataforma que ofrece este evento para establecer contactos comerciais e promocionar a diversidade e calidade das súa elaboracións.•
Cargando ...
