Aberta a inscrición para cursos gratuítos de xoeiría, coiro e tecido

A Vicepresidencia da Deputación de Lugo, a través da área de Artesanía e Deseño, abriu o prazo de inscrición para os cursos gratuítos que se impartirán no primeiro semestre de 2025 no Centro de Artesanía e Deseño (Centrad).
A oferta formativa inclúe o curso ‘Fusión creativa. Explorando metal e cerámica no deseño de xoias’, que se desenvolverá do 24 de febreiro ao 27 de marzo, de 16:30 a 20:20 horas. Tamén se impartirá o curso ‘Elaboración de complementos de coiro’, do 24 de febreiro ao 20 de marzo, de 10:00 a 13:30 horas, centrado no manexo de ferramentas e técnicas específicas para traballar este material.
Por último, o curso ‘Tear de baixo lizo’ ofrecerá formación en técnicas de tecido tradicional do 21 de marzo ao 30 de maio, en horario de 16:30 a 20:30 horas.
O vicepresidente da Deputación de Lugo, Efrén Castro, destacou que esta programación busca apoiar e promover o sector artesán. Todos aqueles interesados deberán cubrir o formulario dispoñible na web da Deputación e envialo a info.centrad@deputacionlugo.org antes das 15:00 horas do 20 de febreiro.•