O salón de actos Ánxel Fole, da Casa de Cultura de Quiroga, acolleu a presentación do novo libro de Celia Díaz, titulado “Todos Calan”. Ao acto asistiu o alcalde de Quiroga, José Luis Rivera, quen deu a benvida aos presentes e desexou moitos éxitos á autora co seu novo traballo. A presentación foi dirixida por Alejandro Del Pont, quen contou coa colaboración de Ramón Vila e Rosa Carrete, que leron varios capítulos da obra.
A novela, que se desenvolve en torno a tramas de crime, segredos familiares e traizóns, ten como un dos seus escenarios a Casa da Rodela, onde Díaz atopou inspiración para a súa historia. A autora, filla adoptiva de Quiroga, explicou que o libro permaneceu durante cinco anos agochado no seu ordenador, mentres seguía perfeccionando os seus personaxes. A trama transcorre nos anos cincuenta na Casa do Souto, cunha forte presenza feminina, con mulleres de distintas xeracións e pensamentos.
Durante o acto, Celia Díaz leu un dos capítulos do libro, que foi moi ben recibido polos asistentes. Ao final, os veciños que desexaron obtiveron a sinatura da autora e tiveron a oportunidade de intercambiar impresións sobre a obra.
Este evento supón unha nova achega cultural para Quiroga e un recoñecemento ao talento literario da súa veciña.•
Cargando ...
