Galicia alcanzou un novo fito no seu sistema sanitario público tras acadar a cifra de 10.000 transplantes de órganos realizados na comunidade desde a posta en marcha do programa en 1981. Este logro reflicte o compromiso e a solidariedade dos galegos, que conxugan a súa xenerosidade co traballo das autoridades sanitarias e o Servizo Galego de Saúde (Sergas).
O primeiro transplante renal na comunidade realizouse no Hospital Público da Coruña en 1981, e ata a data, Galicia leva efectuado un total de 5.168 transplantes deste órgano. Posteriormente, en 1991, iniciáronse os transplantes de corazón, alcanzando un total de 959 intervencións. No ano 1994, os transplantes hepáticos comezaron a levarse a cabo nas áreas sanitarias de Santiago e Barbanza, e na Coruña e Cee, cun total de 2.803 transplantes realizados ata o momento.
En 1999, Galicia incorporaba o transplante pulmonar (942 intervencións) e o transplante de páncreas (128 operacións realizadas nos seus primeiros 25 anos). A Xunta destaca que estes logros non serían posibles sen a doazón de órganos de 3.487 persoas falecidas e das 468 persoas que doaron o seu ril en vida.
O ano 2024 rematou con cifras históricas, rexistrando un total de 424 transplantes, un 28% máis que no ano anterior, e alcanzando a maior taxa de doantes por millón de habitantes, cun 50,7%. Tamén se logrou reducir á menor cifra da historia o número de pacientes á espera de transplante, con só 193 persoas. Actualmente, 8 de cada 10 familias galegas aceptan a doazón de órganos.•
Cargando ...
