A Casa da Cultura Poeta Lois Pereiro de Monforte de Lemos someterase a unha reforma para mellorar a súa eficiencia enerxética grazas a un orzamento de 150.000 euros. A iniciativa foi posible grazas á colaboración institucional entre o Concello, que achega 32.976,56 euros (21,99% do total), a Xunta de Galicia, cunha contribución do 19,50%, e os Fondos Europeos FEDER, que financian o 58,51% do proxecto.
As actuacións previstas inclún melloras na envolvente térmica, climatización e iluminación do edificio. Entre as intervencións destacan a renovación da carpintería exterior na fachada principal con fiestras de aluminio con rotura de ponte térmica e dobre acristalamento, o que reducirá a perda de enerxía e mellorará o confort dos usuarios. Tamén se instalará un novo sistema de calefacción e climatización mediante bombas de calor, permitindo contar con refrixeración no verán, ademais de reducir o consumo de enerxía primaria e as emisións de CO2.
En canto á iluminación, substituiranse as luminarias fluorescentes por tecnoloxía LED de alta eficiencia, incluíndo sistemas de detección de presenza para optimizar o consumo eléctrico. Ademais do aforro enerxético, esta renovación suporá unha redución no custo de mantemento, xa que as lámpadas LED teñen unha vida útil moito maior ca as actuais.
A superficie sobre a que se intervirá na Casa da Cultura abrangue 1.130,25 metros cadrados. O proxecto xa foi licitado a través da Plataforma de Contratos do Sector Público, cun prazo de presentación de ofertas ata o 8 de marzo. Unha vez adxudicadas, as obras terán un prazo de execución de seis meses.
A visita institucional do Conselleiro de Presidencia, Xustiza e Deportes da Xunta de Galicia, Diego Calvo, permitiu afondar na liña de axudas para proxectos de eficiencia enerxética en infraestruturas municipais. O titular autonómico anunciou a nova convocatoria destas subvencións para o período 2025-2026, cun orzamento de 5 millóns de euros cofinanciados con fondos FEDER. Os concellos de menos de 30.000 habitantes poderán optar a estas axudas, que cubrirán ata o 80% dos custos das actuacións, cunha subvención máxima de 120.000 euros por proxecto.
Os investimentos poderán destinarse a melloras na envolvente térmica, iluminación e climatización de edificios municipais, sempre que se garanta unha redución mínima do 20% no consumo de enerxía primaria non renovable e nas emisións de gases de efecto invernadoiro. A convocatoria busca fomentar o aforro enerxético e económico dos concellos, contribuír á redución da pegada de carbono e mellorar a calidade das infraestruturas municipais.•
Cargando ...
